कञ्चनपुर: लालझाडी गाउँपालिका वडा नं ४ खल्ला जाईमा स्थानीयका ३ घरमा जंगली हात्तीले क्षति गरेको छ। गएराती लालझाडी-४ खल्लाजाईका स्थानीय हरिलाल टमाटा, शारदा टमाटा र ठग्गी कडाराका घर हात्तीले भत्काईदिएको स्थानीयले बताएका छन।
लालझाडी हात्तीपीडित संघर्ष समितिका अध्यक्ष दर्शन रानाले गएराती हात्तीको बथानले तीन स्थानीयको घर भत्काईदिएको बताए। उनका अनुसार हात्तीले कच्ची घर भत्काएर अन्न पनि नष्ट गरिदिएपछि हात्तीपीडित टमाटा र कडारा परिवारको विचल्ली भएको छ। यस बर्ष गत असोजदेखि हात्तीले मानिस, भौतिक सरचना, घर अन्नबालीमा क्षति पुर्याउदा समेत तिनै तहका सरकारले हात्ती नियन्त्रणका लागि पहल नगरेको स्थानीयको दुखेसो छ। गत असोज दोस्रो साता हात्तीको बथानले लालझाडीका युवकको मृत्यु भएको थियो। थुप्रै घरमा क्षती गरेको छ। किसानको उखुवालीमा समेत क्षती पुर्याएको छ।
लालझाडी गाँउपालिका अध्यक्ष निर्मल रानाले हात्ती नियन्त्रणका लागि स्थानीय सरकारले प्रदेश र संघीय सरकारसंग पहल गरेको भईरहेको बताएका छन्। ‘हात्तीबाट हुने क्षति न्यूनिकरणका लागि हाम्रो पहल जारी छ, ‘उनले भने, ‘हात्ती नियन्त्रण गर्न हामी स्थानीय सरकारको प्रयासले मात्रै हुन लागेको छैन, त्यसमा थप माथिल्ला सरकारले पनि हेर्नुपर्छ। लालझाडीका नागरिकको सुरक्षाका लागि पालिका लागिपरेको अध्यक्ष रानाले बताएका छन्।
