कञ्चनपुर – जय महांकाल युवा समूह, कञ्चनपुर जिल्ला कमिटीको आयोजनामा महाशिवरात्रि मेला तथा सांस्कृतिक महोत्सव २०८१ बिहीबार भव्य रूपमा सम्पन्न भएको छ। धार्मिक आस्था, संस्कृति र मनोरञ्जनको रूपमा सम्पन्न भएको यस कार्यक्रममा विभिन्न क्षेत्रका प्रतिष्ठित व्यक्तित्वहरूको उपस्थितिले थप गरिमा प्रदान गर्यो।
कार्यक्रमका सभाध्यक्ष हर्क बहादुर बोहरा (जिल्ला अध्यक्ष, जय महांकाल कञ्चनपुर) रहनु भएको थियो भने प्रमुख अतिथिका रूपमा डा. टी.एन. जोशी (उपकुलपति, सुदूरपश्चिम प्रदेश प्रज्ञा प्रतिष्ठान) को विशेष उपस्थिति रहेको थियो। कार्यक्रमलाई थप प्रभावशाली बनाउन विशिष्ट अतिथिका रूपमा हेमराज ओझा (मेयर, कृष्णपुर नगरपालिका) अर्जुन सिंह साउद (वडा अध्यक्ष, कृष्णपुर-२, कञ्चनपुर) जय राज पाण्डेय (पूर्व अध्यक्ष, कृष्णपुर गाउँ विकास समिति) व्यक्तित्वहरू उपस्थित भएका थिए।
सांस्कृतिक प्रस्तुति र मुख्य आकर्षण
महाशिवरात्रि मेलाको मुख्य आकर्षणका रूपमा राष्ट्रिय गायक हेमन्त शर्मा को शानदार प्रस्तुति रहेको थियो। त्यसैगरी, साहित्यकार श्रीजन श्री र गायिका डिक्रा बादीको मनमोहक प्रस्तुति दर्शकहरूका लागि अविस्मरणीय बन्यो।
कार्यक्रमलाई आकर्षक बनाउन उद्घोषक के.पी. कलौनी ले विशेष भूमिका निर्वाह गर्नुभएको थियो भने कलाकार डान्स स्टुडियो तथा स्थानीय प्रतिभाहरूको उत्कृष्ट सांस्कृतिक प्रस्तुति दर्शनीय रह्यो।
उल्लासमय वातावरणमा सम्पन्न कार्यक्रम
शिवभक्तहरूको ठूलो भीडका बीच सम्पन्न कार्यक्रमले धार्मिक तथा सांस्कृतिक महत्वलाई उजागर गर्दै स्थानीय प्रतिभाहरूलाई प्रस्तुत गर्ने अवसर प्रदान गर्यो। यस उत्सवले कृष्णपुर क्षेत्रमा पर्यटन प्रवर्द्धनमा समेत महत्वपूर्ण योगदान दिने विश्वास गरिएको छ।
जय महांकाल युवा समूह, कञ्चनपुर जिल्ला कमिटीले आगामी दिनमा अझ वृहत् रूपमा यस्ता धार्मिक तथा सांस्कृतिक कार्यक्रम आयोजना गर्ने प्रतिबद्धता जनाएको छ।
