वन क्षेत्रमै देउथान मन्दिर निर्माण, अनुमतिबिनै काम अघि बढाएको आरोप

गोदावरी नगरपालिका–५ मा वन क्षेत्रभित्र देउथान मन्दिर निर्माण कार्य सुरु गरिएको विषयले चर्चा पाएको छ । देशभर सार्वजनिक स्थानमा बनेका अवैध संरचना हटाउने अभियान चलिरहेका बेला वन क्षेत्रमै निर्माण कार्य अघि बढाइएपछि स्थानीयस्तरमा प्रश्न उठ्न थालेको हो ।
वडा नं. ५ का अध्यक्ष सुद्दिराम चौधरीका अनुसार निर्माण कार्य अघि बढाउन उपभोक्ता समिति मार्फत डिभिजन वन कार्यालयसँग समन्वय गरेर आवश्यक अनुमति लिनुपर्ने थियो । उनले वनसँग सहकार्य गरेर मात्रै काम अगाडि बढाउन भनिएको बताए ।
यता सम्बन्धित वनका अध्यक्ष अमृत चौधरीले भने वनसँग कुनै अनुमति नलिइकनै निर्माण कार्य सुरु गरिएको जानकारी दिए । उनका अनुसार उक्त स्थान वनको खाली क्षेत्र हो, जहाँ नजिकै पशु चौपायाका लागि गौशाला समेत निर्माण गरिएको छ र सोही क्षेत्रमा देउथान बनाउन लागिएको हो ।
वन ऐन अनुसार वन क्षेत्रभित्र बाटोमा परेको एउटा रुख काट्न समेत अनुमति आवश्यक पर्ने व्यवस्था रहेको छ भने अन्य संरचना निर्माण गर्नका लागि झन् अनिवार्य रूपमा स्वीकृति लिनुपर्ने देखिन्छ । वनका अध्यक्ष चौधरीले हाल निर्माण कार्य तत्काल रोक्न लगाई आवश्यक प्रक्रिया अघि बढाइने बताए ।
वडा अध्यक्ष चौधरीका अनुसार प्रदेश सरकारले देउथान मन्दिर निर्माणका लागि १० लाख रुपैयाँ बजेट विनियोजन गरेको छ ।

The post वन क्षेत्रमै देउथान मन्दिर निर्माण, अनुमतिबिनै काम अघि बढाएको आरोप appeared first on .