सुदूरपश्चिमेली नेपाली समाजको चौथो महाधिवेशन सम्पन्न: धर्मराज पाण्डेयको अध्यक्षतामा नयाँ अन्तर्राष्ट्रिय कार्यसमिति चयन

धनगढी। विश्वभर छरिएर रहेका सुदूरपश्चिमेलीहरूको साझा अन्तर्राष्ट्रिय सञ्जालको रूपमा स्थापित सुदूरपश्चिमेली नेपाली समाजको चौथो महाधिवेशन गत कार्तिक १४ गते सुदूरपश्चिम प्रदेशको राजधानी धनगढीमा भव्य रूपमा सम्पन्न भएको छ। संस्थागत एकता, सहकार्य र “सुदूरपश्चिमका लागि सुदूरपश्चिमेली” भन्ने मूल नारालाई आत्मसात् गर्दै सम्पन्न उक्त महाधिवेशनले धर्मराज पाण्डेयको अध्यक्षतामा नयाँ अन्तर्राष्ट्रिय कार्यसमिति सर्वसम्मत रूपमा चयन गरेको छ।

​नयाँ नेतृत्व तथा पदाधिकारीहरू

सम्पन्न महाधिवेशनबाट युएईका धर्मराज पाण्डेय अध्यक्ष पदमा निर्वाचित हुनुभएको छ। त्यस्तै वरिष्ठ उपाध्यक्षमा उमेश जोशी (बहराइन), प्रथम उपाध्यक्षमा बिनोद चन्द (जापान), द्वितीय उपाध्यक्षमा दिल्ली राज पनेरु (दक्षिण कोरिया), र महिला उपाध्यक्षमा दिपा देवी ऐर (टेक्सास, अमेरिका) चयन हुनुभएको छ।

​कार्यसमितिको महासचिवमा डम्मर बहादुर खड्का (पोर्चुगल), सचिवमा राज बहादुर साउद (थाइल्यान्ड), कोषाध्यक्षमा भुवन प्रसाद भट्ट (भारत), सह–कोषाध्यक्षमा निलम मल्ल ठकुरी (क्रोएसिया), गल्फ संयोजकमा रमेश जोशी (इजरायल) र गल्फ उपसंयोजकमा दामोदर सिंह (युएई) निर्वाचित हुनुभएको छ।

​निर्वाचित सदस्यहरू र रिक्त पदपूर्ति

अन्तर्राष्ट्रिय समितिको सदस्यहरूमा सागर सिंह (जापान), गोरख चन्द (कतार), नारद बोगटी (इजरायल), भोज चन्द (दक्षिण कोरिया) र खगेन्द्र धामी (रुस) सर्वसम्मत रूपमा चयन हुनुभएको छ। पदाधिकारी तथा कार्यसमितिमा रिक्त रहेका बाँकी पदहरूमा सम्पूर्ण राष्ट्रिय समाजहरूसँग आवश्यक समन्वय र सहकार्य गरी यथाशीघ्र पदपूर्ति गरिने जनाइएको छ।

​११ बाट २८ राष्ट्रमा विस्तार: एक गौरवपूर्ण यात्रा

अन्तर्राष्ट्रिय समितिको परिकल्पना गरी सुरुमा ११ वटा राष्ट्रिय समाजबाट प्रारम्भ भएको यस अभियानले आज विश्वभर आफ्नो संगठनात्मक उपस्थिति विस्तार गरिसकेको छ। हाल विश्वका विभिन्न मुलुकमा रहेका २८ वटा राष्ट्रिय समाजहरू यस अन्तर्राष्ट्रिय समितिमा आबद्ध भइसकेका छन्। यो ऐतिहासिक उपलब्धि कुनै एक व्यक्तिको मात्र नभई सम्पूर्ण राष्ट्रिय समाज, संस्थापक, अग्रज, अभियन्ता र समर्पित सदस्यहरूको सामूहिक प्रयास, धैर्यता र निरन्तर योगदानको प्रतिफल रहेको समाजले जनाएको छ।

​विशिष्ट अतिथिहरूको गरिमामय उपस्थिति र आभार प्रकट

छोटो समयको तयारीका बाबजुद ऐतिहासिक रूपमा सम्पन्न महाधिवेशनमा सुदूरपश्चिम प्रदेश सरकारका माननीय मुख्यमन्त्री, कैलाली क्षेत्र नं. ५ का माननीय संघीय सांसद, सुदूरपश्चिम प्रदेशका माननीय आर्थिक मामिलामन्त्री, धनगढी उपमहानगरपालिकाका नगर प्रमुख, सुदूरपश्चिम प्रदेश तथा कैलाली उद्योग वाणिज्य संघका अध्यक्षहरू लगायत विभिन्न संघ-संस्थाका प्रमुख, प्रतिनिधि, सञ्चारकर्मी, सुरक्षाकर्मी, कलाकार तथा स्वदेश र विदेशबाट पाल्नुभएका महाधिवेशन प्रतिनिधिहरूको बाक्लो उपस्थिति रहेको थियो। कार्यक्रमलाई सभ्य, व्यवस्थित र फलदायी बनाउन योगदान पुर्‍याउने सम्पूर्ण सहयोगी, निवर्तमान कार्यसमिति र शुभेच्छुकहरूप्रति हार्दिक आभार व्यक्त गरिएको छ।

​आगामी कार्यदिशा र नयाँ नेतृत्वप्रतिको अपेक्षा

संस्थाको वास्तविक शक्ति नेतृत्वमा मात्र नभई संस्थाप्रति समर्पित र सकारात्मक सोच भएका सदस्यहरूमा निहित हुने कुरालाई जोड दिँदै नव निर्वाचित नेतृत्वले नेपाल समन्वय समितिलाई समेत थप प्रभावकारी बनाउने अपेक्षा राखिएको छ। नेपाल समन्वय समितिमा समाजप्रति निःस्वार्थ भावनाले योगदान पुर्‍याइरहेका उपयुक्त व्यक्तित्वहरूलाई समावेश गर्दै लगिनेछ।

​नव निर्वाचित कार्यसमितिले संस्थाको विधान, उद्देश्य र मूल मर्मलाई आत्मसात् गर्दै पारदर्शिता, एकता, सहकार्य र आपसी विश्वासलाई अझ सुदृढ बनाउने विश्वास लिइएको छ। “हाम्रो एकता, हाम्रो पहिचान; हाम्रो अभियान, समृद्ध सुदूरपश्चिमको सम्मान” भन्ने साझा संकल्पका साथ अघि बढेको यो समाज आगामी दिनमा अझ सबल र गौरवशाली बन्ने लक्ष्यका साथ अगाडि बढेको छ।

The post सुदूरपश्चिमेली नेपाली समाजको चौथो महाधिवेशन सम्पन्न: धर्मराज पाण्डेयको अध्यक्षतामा नयाँ अन्तर्राष्ट्रिय कार्यसमिति चयन appeared first on ✍️कञ्चन मिडिया📸.