शुक्लाफाँटा नगरपालिकाले ल्यायो ९५ करोड ८४ लाख बजेट, कुन क्षेत्रमा कति विनियोजन ?

कञ्चनपुर। शुक्लाफाँटा नगरपालिकाले आर्थिक वर्ष २०८३/०८४ का लागि ९५ करोड ८४ लाख ४९ हजार रुपैयाँको बजेट सार्वजनिक गरेको छ। सोमबार आयोजित २२ औँ नगरसभामा नगर उपप्रमुख कल्पना पन्तले आगामी आर्थिक वर्षको अनुमानित आय-व्यय प्रस्तुत गर्दै बजेट सार्वजनिक गरेकी हुन्।

उनले प्रस्तुत गरेको बजेटअनुसार नगरपालिकाको आन्तरिक आय २ करोड ४२ लाख ८४ हजार रुपैयाँ रहने अनुमान गरिएको छ। मालपोत तथा घरजग्गा रजिष्ट्रेशन शुल्कबाट ७३ लाख रुपैयाँ, संघीय सरकारको राजस्व बाँडफाँटबाट १३ करोड ५६ लाख ४६ हजार रुपैयाँ तथा प्रदेश सरकारको राजस्व बाँडफाँटबाट ५३ लाख ५६ हजार रुपैयाँ प्राप्त हुनेछ।

त्यसैगरी, नेपाल सरकारको अन्तरसरकारी वित्तीय हस्तान्तरणबाट ४३ करोड ३९ लाख रुपैयाँ, प्रदेश सरकारको अन्तरसरकारी वित्तीय हस्तान्तरणबाट ७ करोड ९९ लाख ६३ हजार रुपैयाँ प्राप्त हुनेछ।

यस्तै, अन्य आन्तरिक आयबाट २ करोड रुपैयाँ, सडक बोर्डबाट ५० लाख रुपैयाँ तथा सामाजिक सुरक्षा तथा संरक्षण कार्यक्रमका लागि २५ करोड रुपैयाँ प्राप्त हुने अनुमान गरिएको छ।

व्ययतर्फ नगरपालिकाले चालु खर्चका लागि ७१ करोड ७२ लाख ४ हजार ८ सय ४३ रुपैयाँ तथा पूँजीगत खर्चका लागि २४ करोड १२ लाख ४४ हजार १ सय ५६ रुपैयाँ विनियोजन गरेको छ।

कुन क्षेत्रमा कति बजेट ? 
शुक्लाफाँटा नगरपालिकाले क्षेत्रगतमा आर्थिक विकासतर्फ ९० लाख ५० हजार रुपैयाँ, सामाजिक विकासतर्फ ५९ करोड ६१ लाख १४ हजार ८ सय ४३ रुपैयाँ, पूर्वाधार विकासतर्फ २३ करोड ५ लाख ९४ हजार १ सय ५६ रुपैयाँ, सुशासन तथा अन्तरसम्बन्धित क्षेत्रतर्फ १६ लाख रुपैयाँ र कार्यालय सञ्चालनतर्फ १२ करोड १० लाख ९० हजार रुपैयाँ छुट्याइएको छ।

नगरसभामा अगामी वर्षको नीति तथा कार्यक्रम नगर प्रमुख रणबहादुर महराले प्रस्तुत गरेका थिए। नगरसभाले नीति तथा कार्यक्रम र बजेट सर्वसम्मत पारित गरेको छ। – सत्य दृश्यबाट

The post शुक्लाफाँटा नगरपालिकाले ल्यायो ९५ करोड ८४ लाख बजेट, कुन क्षेत्रमा कति विनियोजन ? appeared first on .