कञ्चनपुरमा निःशुल्क आवासीय सुविधासहितको संस्कृत शिक्षा, श्री ग्वासीसमैजी संस्कृत वेद विद्याश्रममा भर्ना खुल्यो
कृष्णपुर – कञ्चनपुर जिल्लाको कृष्णपुर नगरपालिका वडा नं. ४, मालुबेलास्थित श्री ग्वासीसमैजी संस्कृत वेद विद्याश्रमले नयाँ शैक्षिक सत्र २०८३ का लागि नयाँ विद्यार्थी भर्ना प्रक्रिया सुरु गरेको छ। सनातन हिन्दू संस्कार, वैदिक परम्परा र आधुनिक ज्ञानको अनुपम संगम प्रदान गर्ने उद्देश्यले स्थापित यस विद्याश्रमले यस वर्ष कक्षा ६ मा भर्ना खुला गरेको हो। श्री ग्वासीसमैजी धाम परिसरमा महायज्ञ सञ्चालन गरी स्थापना गरिएको यस गुरुकुलमा विद्यार्थीहरूले नेपाल सरकारको आधिकारिक पाठ्यक्रम अनुसारका अनिवार्य विषयहरू नेपाली, अङ्ग्रेजी र गणितका साथै विशेष रूपमा वेद, कर्मकाण्ड, संस्कृत भाषा र संस्कृत व्याकरणको गहन अध्ययन गर्न पाउनेछन्।
आर्थिक अवस्थाका कारण शिक्षाबाट कोही पनि वञ्चित हुन नपरोस् भन्ने पवित्र लक्ष्यका साथ विद्याश्रमले विद्यार्थीहरूका लागि पूर्ण रूपमा निःशुल्क आवासीय सुविधा (बस्ने र खाने व्यवस्था) उपलब्ध गराएको छ। भर्ना हुन चाहने इच्छुक विद्यार्थीहरूले कक्षा ५ उत्तीर्ण गरेको हुनुपर्ने प्रावधान राखिएको छ। विद्याश्रमद्वारा प्रकाशित सूचना अनुसार, भर्ना फारम वितरण यही बैशाख १५ गतेदेखि २१ गतेसम्म हुनेछ भने आवेदन दिएका विद्यार्थीहरूका लागि प्रवेश परीक्षा बैशाख २५ गते बिहान ११:०० बजे सञ्चालन गरिनेछ। सफलतापूर्वक छनोट भएका विद्यार्थीहरूको नियमित पठनपाठन भने बैशाख २८ गतेदेखि सुरु हुनेछ।
”विद्या धर्मः सर्व धर्मः प्रधानम्” भन्ने आदर्श वाक्यलाई आत्मसाथ गर्दै संस्कारयुक्त शिक्षा र उज्वल भविष्यको आधार निर्माण गर्न कटिबद्ध यस विद्याश्रमले थप जानकारीका लागि विभिन्न सम्पर्क नम्बरहरू (९८४८५१२१९६, ९८४७५६२५१५, ९८४८४९१३३६, ९८५८४२१९९०, ९८४८७६३३७०, ९७६२४५०५२६) समेत उपलब्ध गराएको छ। सुदूरपश्चिम क्षेत्रमा लोप हुँदै गएको संस्कृत शिक्षाको संरक्षण र संवर्द्धनमा यस विद्याश्रमको कदम महत्वपूर्ण साबित हुने विश्वास गरिएको छ।
The post कञ्चनपुरमा निःशुल्क आवासीय सुविधासहितको संस्कृत शिक्षा, श्री ग्वासीसमैजी संस्कृत वेद विद्याश्रममा भर्ना खुल्यो appeared first on .
